د پوهنې وزارت د بېلابېلو ریاستونو یو شمېر کارکوونکو لپاره د وړتیا لوړونې سیمینار دایر شو
د پوهنې وزارت د نتایجو او شهادتنامو، د کابل ولایت او ښار د پوهنې، او دارالعلومونو ریاستونو کارکوونکو لپاره د وړتیا لوړونې دوه ورځنی سیمینار د نتایجو او شهادتنامو د رئیس محترم مولوي عبدالقدیم محمد آخندزاده په حضور کې پیل شو.
د نتایجو او شهادتنامو رئیس ګډونوالو ته د هرکلي ترڅنګ وویل، چې د دغسې ښوونیزو سیمینارونو جوړول د کارکوونکو مسلکي پوهې لوړولو، د همغږۍ او اجراآتو ښهوالي، د علمي نظریاتو تبادلې، د انتقاد منلو روحيې پیاوړتیا او د منطقي استدلال ودې لپاره خورا مهم دي او زیاته یې کړه چې پورته ذکر شوي موارد د ستونزو اسانه کولو او حل سبب ګرځي او د یادو موضوعاتو په اړه یې په تفصیل سره خبرې وکړې.
