د پوهنې وزارت د اساسي او ثانوي زده کړو رئیس بادغیس ولایت ته په رسمي سفر ولاړ
د پوهنې وزارت د اساسي او ثانوي زده کړو رئیس مفتي محمد یوسف «ثاقب»، د ښوونکو د مسلکي پراختیا د پروګرامونو پلي کولو، د ښوونکو د استخدام له پروسې څخه په ځانګړي ډول د لرې پرتو سیمو د ښوونکو د ګمارلو د بهیر، د پوهنې وزارت او مرستندویه بنسټونو ترمنځ د هوکړه لیکونو د پلي کولو څخه د ډاډګیرنې په موخه، کوم چې د یاد وزارت او مرستندویه بنسټونو ترمنځ د هېواد د ښوونیز نظام د بډاینې په برخه کې لاسلیک شوي، بادغیس ولایت ته ورسېد. نوموړي په هغه کتنه کې چې د بادغیس له پوهنې رئیس الحاج مولوي محب الله احسان او د یاد ریاست له کلیدي مسئولینو سره درلوده، د خپل سفر د موخو د بیانولو په ترڅ کې وویل: پوهنې وزارت د هېواد په ټولو برخو کې ښوونیز او روزنیز پراختیایي پروګرامونه په متوازن ډول پلي کوي. په یاده غونډه کې د پوهنې وزارت د پلانونو د عملي کولو په موخه، د ښوونې او روزنې معینیت، د اداري لوی ریاست، د ښوونکو د روزنې او مسلکي پراختیا، د اساسي او ثانوي زده کړو ریاستونو یو ګډ پلاوی وټاکل شو. ټاکل شوې ده چې دغه پلاوی د خپلو کاري موخو د ترلاسه کولو په برخه کې د هر اړخیزو څېړنو او ارزونو په موخه، د دغه ولایت ولسوالیو ته هم سفر وکړي.
