د ولایتونو پوهنې کړنو ته لنډه کتنه
غزني
د غزني ولایت د قرباغ ولسوالۍ یو شمېر قومي مخورو او سپین ږیرو، د یاد ولایت له پوهنې رئیس الحاج مولوي میر نصیر احمد حسیني سره په کتنه کې، ښوونیزو بنسټونو ته د پوهنې ریاست د مشرتابه پاملرنې غوښتنه وکړه.
بیا هم له یاد ولایت څخه:
د غزني ولایت پوهنې رئیس د امام هادي لومړني ښوونځي د بیارغونې له چارو څخه څارنه وکړه او د قراردادي شرکت له مسئولینو سره یې په کتنه کې د ساختماني موادو پر کیفیت ټینګار وکړ.
پروان
د پروان ولايت پوهنې رئيس مولوي سيد محمد فيضي، د یاد ولايت شيخ علي ولسوالۍ د ښوونځيو اداري او تدريسي چارې وڅېړلې، د مدارسو، ښوونځيو او نورو سيمه ييزو ادارو له مسئولينو سره يې د درسي کيفيت لاښه والي په تړاو خبرې او نظرونه تبادله کړل.
پکتیا
د پکتيا ولايت زرمت ولسوالۍ اړوند د کوتي خېلو د کلي يو شمېر قومي مشرانو او سپین ږیرو، د یاد ولايت له پوهنې رئيس مولوي عبدالقيوم فاروقي سره په کتنه کې، د پوهنیز نظام لا ښه والي په اړه خپلې ستونزې او وړانديزونه شريک کړل.
