د ولایتونو پوهنې خبرونو ته لنډه کتنه
بلخ
د بلخ ولایت د ښوونځیو شوراګانو، د مزارشریف ښار اړوند د ابوریحان البیروني، رئیس عبدالخالق او عطا محمد لېسو ته د ۵۰ زره افغانیو په لګښت، د اوبو پمپونه، پایپونه او څاه ګان برابر او د ټولګیو ځینې برخې یې بیاورغولې.
غزني
د پوهنې یو همکار بنسټ د غزني ولایت واغظ ولسوالۍ اړوند د شهید عبدالکبیر لېسې لپاره په تخنیکي وسایلو سمباله کمپیوټر خونه جوړه کړه.
په یاده کمپیوټرخونه کې د درسونو د تدریس لپاره شاوخوا ۱۵ پایې کمپیوټرونه او یو LCD د درسونو د تدریس په موخه نصب شول.
هرات
د هرات ولايت پوهنې رئيس مولوي رحمت الله جابر، د شهرک آريانا عالي لېسې څخه د ليدنې پر مهال، د يادې لېسې له ښوونکو او د شورا له غړو سره هم وکتل.
نوموړي د شورا له غړو سره د ناستې اساسي موخه، د پوهنې په برخه کې د شته ستونزو د حل او د سيمې د خلکو د غوښتنو آورېدل وبلل.
لوګر
د لوګر ولایت د پوهنې رئیس الحاج مولوي عبدالرحمن حمیدي په مشرۍ د یاد ولایت د پوهنې ریاست اداري غونډه جوړه شوه.
په یاده ناسته کې د دولتي او خصوصي ښوونیزو ادارو مسئولینو د خپلو پلانونو او پروګرامونو په اړه معلومات وړاندې کړل.
همدارنګه
د لوګر ولایت څرخ ولسوالۍ اړوند د ۵۰ بابه دیني مدارسو د ۷۰ اداري کارکوونکو لپاره د وړتیا لوړونې سیمینار جوړ شو.
په پام کې ده، چې په دغه سیمینار کې به د پوهنې وزارت کارپوهانو له لوري ګډون والو ته اداري او مالي مسایل تدریس شي.
