د ولایتونو له پوهنې ډګره څو لنډ خبرونه
دایکنډي
د دایکنډي ولایت پوهنې رئیس محترم الحاج مولوي رحمت الله قندیلي د ودانیزو پروژو له یو شمېر اجرایوي چارواکو سره مشورتي غونډه وکړه او د یاد ولایت په مرکز او ولسوالیو کې یې د ۱۷ بابه ښوونځیو جوړولو په اړه له یو بل سره همغږي وکړه.
غزني
د غزني ولایت پوهنې چارواکو په وینا، د یاد ولایت خواجه عمري ولسوالۍ اړوند په حمزه کلي کې د یو باب مدرسې جوړولو کارونه، چې د روان کال په پیل کې د یو علم پروره شخص لخوا پیل شوي وو، شاوخوا ۶۰ سلنه پرمخ تللي.
غور
په هغه ځمکه کې چې د غور ولایت د پسابند ولسوالۍ اوسېدونکو لخوا د جمال الدین لومړني ښوونځي لپاره ورکړل شوې وه، تر اوسه پورې څلور درسي خونې او د اوبو څاه چمتو شوی او د سیمې اوسېدونکو ژمنه کړې چې د ۱۷۰ زره افغانیو په لګښت به د دې ښوونځي ودانۍ بشپړه کړي.
هرات
د هرات ولایت فرسي ولسوالۍ د دوآب عالي لېسې لابراتوار خونه د پوهنې مسئولینو، چارواکو، ښوونکو او د لېسې د یو شمېر زدهکوونکو په ګډون تر پرانیستنې وروسته ګټې اخیستنې ته وسپارل شوه.
میدان وردګ
یو خیرخواه وګړي د میدان وردګ په مرکز میدان ښار کې د عثمان رستم خېل لومړني ښوونځي زدهکوونکو لپاره د تشنابونو جوړولو په موخه ۱۱۶ زره افغانۍ مرسته وکړه.
