د هیواد د تودو ولایتونو د درېیمو ټولګيو زده کوونکو د تعلیمي کچې ارزونې ورکشاپ پیل شو
د پوهنې وزارت د معیاري آزموینو او پایلو ارزونې د څانګې متخصصینو، کارپوهانو او علمي غړو، د تودو ۱۰ ولایتونو (هلمند، فراه، نیمروز، فاریاب. جوزجان، سرپل، بغلان، ننګرهار، لغمان او کونړ) د درېیمو ټولګيو زده کوونکو د تعلیمي کچې ارزونې په موخه ورکشاپ د کابل په انټرکانټیننټال هوټل کې پیل کړ.
د پوهنې وزارت د معياري آزموينو او پايلو ارزونې رئيس مولوي شمس الرحمن حماس د پرانستې په مراسمو کې د دغه ورکشاپ د ارزښتونو د څرګندولو پر مهال، د يادې ادارې کارکوونکو ته د لازمو هدایاتو يادونه وکړه او د هغوى هڅې يې د ستاينې وړ وبللې.
د يادونې وړ ده، چې د همدغه ورکشاپ موخه د يادو ولايتونو د ښوونځیو ٣٦٠ تنو آمرینو/ مديرانو، ١٠٨٠ تنو ښوونکو او د درېیمو ټولګیو اړوند د ١٠٨٠٠ تنو زده کوونکو سره مرکې او د هغوی ارزیابي کول دي، کوم چې د یو همکار بنسټ له لوري تمویلېږي.
