د لغمان ولایت په یوه ښوونځي کې ۹ بابه درسي ټولګي جوړ شول
د پوهنې یوتن مینه وال حاجي عبدالوکیل رسولي، د لغمان ولایت په مرکز مهترلام ښار کې د کتب زایو د هلکانو لېسې په انګړ کې د ۲ میلیونه او ۵۰۰ زره افغانیو په لګښت ۹ درسي ټولګي جوړ کړل.
یاد درسي ټولګي د لغمان ولایت پوهنې رئیس، دیني علماوو، ښوونکو او زده کوونکو په حضور کې ګټې اخستنې ته وسپارل شول.
د یاد ولايت د پوهنې رئيس مولوي شاه جهان ساجد د معلوماتو له مخې، دغه ټولګي په ۲جرېبه ځمکه کې جوړ شوي او په جوړېدو سره یې شاوخوا ١٠٠٠ تنو زده کوونکو ته د تدريس او زده کړې خوندي چاپېریال رامنځته شو.
ويناوالو د هېواد د ماشومانو او ځوانانو لپاره د علم پر اهميت د څرګندونو په ترڅ کې، د مدارسو او ښوونځيو جوړول یو صدقه جاریه عمل وباله.
د پوهنې وزارت مشرتابه د پوهنیز نظام د لاپرمختګ لپاره د خلکو له مرستو د ستاینې ترڅنګ، د لغمان ولایت د پوهنې یو تن بااحساسه شخصیت حاجي عبدالوکیل رسولي څخه مننه او قدرداني کوي.
