د غزني ولایت ګیلان ولسوالۍ د پوهنې آمریت نوې ودانۍ بنسټ ډبره کېښودل شوه
د غزني ولایت د ګیلان ولسوالۍ پوهنې آمریت د نوې ودانۍ بنسټ ډبره، د یاد ولايت د پوهنې رياست مسئولينو په ګډون په داسې حال کې کېښودل شوه، چې د همدغه ولسوالۍ د ښوونځيو آمرینو، مديرانو، علماوو او د خلکو استازو ګډون درلود.
مسئولینو په خپلو خبرو کې د پوهنې پر ارزښت او د ټولنې په اصلاح کې د هغو پر رول ټینګار وکړ او له والدینو یې وغوښتل، چې خپل اولادونه د زده کړې په موخه مدارسو او ښوونځیو ته واستوي.
د يادونې وړ ده، پر دغه ودانۍ ټولټال يو مېليون افغانۍ لګښت راځي، چې د ګيلان ولسوالۍ د خلکو له خوا ورکول کېږي.
د یو بل خبر له مخې:
د همدې ولايت د قره باغ ولسوالۍ نوروز خېلو کلي اوسېدونکو د خپل کلي لومړني ښوونځي د اوبو رسولو سيسټم فعالولو په موخه، د۲۰۰ زره افغانیو مرسته وکړه.
د پوهنې وزارت مشرتابه د هېوادوالو په ځانګړې توګه د غزني ولایت د ګیلان او قره باغ ولسوالیو د علم پروره خلکو له مرستو مننه او قدرداني کوي.
