د غزني ولایت مرکز اړوند په قلعه آزاد کلي کې، د یو ښوونځي د بنسټ ډبره کېښودل شوه 

د غزني ولایت مرکز اړوند په قلعه آزاد کلي کې، د آزاد خان بابا د منځني ښوونځي  د ودانۍ بنسټ ډبره، د یو لړ هغو مراسمو په ترڅ کې چې د یاد ولایت پوهنې ریاست مسئولینو، دیني عالمانو، قومي مشرانو، ښوونکو او زده کوونکو پکې ګډون درلود، کېښودل شوه. 
د یاد ولایت پوهنې رياست د انسجام رئیس مولوي حکیم داد حکيمي په وينا، په پام کې ده، چې ياد منځنى ښوونځى په پینځه جرېبه ځمکه کې د ۱۵میلیونه افغانیو په لګښت سره په دوو پوړونو کې چې شپاړس درسي خونې او نور ضروري ملحقات به ولري، جوړ شي.
د نوموړي په وینا د یاد ښوونځي د ودانۍ مالي لګښت د مرحوم آزاد خان بابا کورنۍ له لوري ورکول کیږي.
د يادونې وړ ده، چې اوس مهال د یاد منځني ښوونځي زده کوونکي په یوه کرایي کور کې په زده کړو بوخت دي، چې د دې ودانۍ په جوړېدو سره به يې شته ستونزه هواره شي.
د یاد ولایت پوهنې ریاست مشرتابه، د مرحوم آزاد خان د کورنۍ له مرستې او همکارۍ د قدردانۍ تر څنګ له خلکو وغوښتل، چې له پوهنې ریاست سره په مادي او معنوي توګه همکاري وکړي او خپل ماشومان د دیني او عصري علومو د زده کړو په موخه، مدارسو او ښوونځیو ته واستوي. 
په پای کې یاده غونډه د دعائیې په لوستلو سره پای ته ورسېده.