د جوزجان ولایت پوهنې ریاست کې یو باب کتابتون او درسي لابراتوار پرانیستل شو
د جوزجان ولایت پوهنې مسٸولینو د یاد ولایت پوهنې ریاست کې د یو مرکزي کتابتون او تعلیمي لابراتوار د پرانیستې خبر ورکړی او وایي چې
د پوهنې وزارت د زدهکوونکو د استعدادونو ودې او هغوی ته د عملي زدهکړو زمینې برابرولو په موخه، د پوهنې په ریاست کې یو باب کتابتون او د ساینسي مضمونونو یو درسي لابراتوار جوړ کړی دی.
یاد کتابتون او لابراتوار په هغه مراسمو کې پرانیستل شول چې پکې د جوزجان محترم والي الحاج مولوي عبدالله سرحدي، د پوهنې رئیس الحاج مولوي لعلجان راشد، د علماوو شورا او د اطلاعاتو او فرهنګ ریاستونو محترمو رئیسـانو، یو شمېر دیني علماوو او پوهنې مسٸولینو ګډون کړی و.
د ياد ولايت والي د پرانیستې په مراسمو کې وویل: پوهنه د ټولنې او اسلامي نظام د ملا تیر ګڼل کېږي او د ځوان نسل لپاره سالمې علمي، اخلاقي او عقیدوي زدهکړې ډېر اهمیت لري.
همدارنګه د یاد ولایت د پوهنې رئیس هم په خپلو خبرو کې وویل: د داسې تعلیمي مرکزونو رامنځته کول د زدهکوونکو د علمي ودې او د مطالعې د کلتور د پیاوړتیا په برخه کې مهم رول لري.
نوموړي زیاته کړه چې په دې کتابتون کې شاوخوا ۲۵۰۰ ټوکه علمي کتابونه په بېلابېلو عنوانونو کې موجود دي، چې زدهکوونکي او د مطالعې مینهوال کولای شي د خپلو علمي معلوماتو زیاتوالي لپاره ترې ګټه واخلي.
