د بغلان ولایت د یو باب دارالعلوم لپاره نوی آمر معرفي شو
محترم مولوي محمد نبي ابو انور د بغلان ولایت د پوهنې ریاست چارواکو لخوا په داسې حال کې معرفي شو، چې د یاد ولایت د تاله او برفک ولسوالۍ د سیمه ییزو ادارو یو شمیر علماء کرام او چارواکي هم حاضر وو.
مراسم د قرآن کریم د څو مبارکو آیتونو په تلاوت سره پیل شول؛ ورپسې حاضرو مسئولینو هر یو په خپلو ویناوو کې، د ټولنې د اصلاح لپاره د پوهنې اهمیت په اړه خبرې وکړې او والدین یې وهڅول، چې خپل ماشومان د علم پوهې لپاره مدارسو او ښوونځيو ته واستوي.
سربېره پردې، محترم مولوي محمد نبي ابو انور د تاله او برفک د دارالعلوم د آمر په توګه د مسئولیت د لېږد په اړه د پوهنې وزارت د مشرتابه له باور ستاینه وکړه او ډاډ یې ورکړ چې د پوهنې وزارت د مشرتابه د لارښوونو او احکامو په رڼا کې به د خپل ټول توان، تجربو او علمي لاسته راوړنو سره د هېواد د ماشومانو د اسلامي، ملي روحیې او خلکو ته د خدمت په برخه کې نه ستړې کېدونکې هڅې وکړي.
