د بامیان ولایت د سادات قوم مشرانو د پوهنې وزارت له سرپرست سره وکتل
د بامیان ولایت د سادات قوم مشرانو په خپلو سیمو کې دځینو مدارسو او ښوونځيو د ستونزو د حل په موخه، له پوهنې وزرات سرپرست الحاج مولوي حبیب الله آغا سره وکتل.
په پیل کې د پوهنې وزارت سرپرست د بامیان ولایت سادات قوم مشرانو او مېلمنو ته ښه راغلاست ووایه او وروسته یې په خپل وار سره د دوی ستونزې او وړاندیزونه واورېدل.
د پوهنې وزارت سرپرست یادو مشرانو ته ډاډ ورکړ چې د دوی د ستونزو په حل کې به هڅې کوي او زیاته یې کړه، د پوهنې وزارت ژمن دی تر څو د هېواد بچیان په اسلامي روحیه وروزي او په دې لاره کې هر ډول هڅې ونه سپموي.
ورپسې د سادات قوم مشرانو د پوهنې وزارت د پروګرامونو او پلانونو د تطبیق او په یاد ولایت کې د ښوونیز بهیر د ودې په برخه کې د یاد وزارت مشرتابه ته له خپل لوري ملاتړ څرګند کړ.
غونډه د دعائیې په لوستلو سره پای ته ورسېده.
