ارزگان ولایت کې د تعلیمي مرکزونو جوړولو لپاره له ۱۲۰ جرېبه څخه زیاته ځمکه وقف شوه
ارزگان ولایت کې د مدارسو او ښوونځیو د ودانیو جوړولو او پراختیا په موخه، د روان ۱۴۰۴ لمریز کال له پیل څخه تر اوسه پورې، د ترینکوټ ښار او د دې ولایت د چنارتو، دهراوود، خاص ارزگان، ګیزاب او چورې ولسوالیو د معارفپالو اوسېدونکو له لوري له ۱۲۰ جرېبه څخه زیاته ځمکه پوهنې ته وقف شوې ده، چې ټولیز ارزښت یې ۱۱ میلیونه او ۴۳۶ زره افغانیو ته رسېږي.
د پوهنې وزارت رهبرۍ د ارزگان ولایت د علمدوستو اوسېدونکو څخه د هغوی د دیني او ملي احساس او د هېواد د ښوونیز نظام څخه د ملاتړ له امله مننه او قدرداني څرګنده او د هغوی دا نېک احساس یې د تعلیمي بنسټونو د پراختیا او د هېواد بچیانو لپاره د تعلیمي فرصتونو زیاتوالي په برخه کې حیاتي بللی دی.
