د پوهنې وزارت د احصایې او معلوماتو رئیس په رسمي سفر پروان ولایت ته لاړ
د پوهنې وزارت د کیفیت تضمین معینیت د احصایې او معلوماتو د رئیس محترم مولوي بسم الله نعماني په مشرۍ پلاوی پروان ولایت ته سفر وکړ.
د یاد سفر اصلي موخه د همدغه ولایت پوهنې ریاست لخوا راټولې شوې احصایې بیاکتنه او تایید دی، کوم چې دمخه د کیفیت تضمین آمریت د احصایې مدیریت لخوا په ۱۲ مخونو کې راټوله او په سیسټم کې ثبت شوې ده.
د دغه سفر په جریان کې، د احصایې ریاست د جبل السراج ولسوالۍ په کچه د پروګرام څارنه او بیاکتنه وکړه ترڅو یاد پروګرام په سمه توګه پلی او د احصایې او کیفیت تضمین ریاست د کارکوونکو دوه کسیزه ټیمونه په منظم ډول د پروان ولایت مرکز او نورو ولسوالیو ته ګمارل شوي ترڅو د معیاري پروسو سره سم د تایید پروسه ترسره کړي.
د پروان ولایت پوهنې رئیس محترم مولوي سید محمد فیضي د دې نوښت هرکلی وکړ او د دغه پروګرام په بریالي پلي کولو کې یې خپله بشپړه همکاري څرګنده کړه.
د یادونې وړ ده چې دغه پروسه د پوهنې وزارت د هغو هڅو یوه برخه ده چې د تعلیمي معلوماتو معیاري کولو، د احصایوي روڼتیا تضمینولو او د یاد وزارت د معلوماتو مدیریت سیسټم پیاوړی کولو په موخه ترسره کېږي.
