د پنجشیر پوهنې ریاست کې د ۱۴۰۰ نوي ښوونیز کال د پلانونو د پلي کولو په موخه ناسته تر سره شوه
د پوهنې وزارت، پنجشیر: د پنجشیر ولایت د پوهنې ریاست اداري غونډه د یاد ولایت د مرکز او ولسوالیو د پوهنې آمرینو او د ښوونځیو د مدیرانو په شتون کې جوړه شوه.
پدې غونډه کې، د یاد ولایت د پوهنې ریاست د بیلابیلو څانګو کار او کړنې د پوهنې رئیس مولانا عتیق الله کریمي لخوا و ارزول شوي.
همدا رنګه د ۱۳۹۹ تعلیمي کال د کلنۍ آزموینو اخیستلو په تړاو، په یاد شوي ښوونیز کال کې د زده کونکو د حاضرۍ معیار او همدارنګه د ۱۴۰۰ نوي ښوونیز کال د پلانونو په هکله لازمې لارښوونې ترسره شوي.
د پوهنې رئیس په اړندو مسوولینو او د ښوونځيو مدیرانو ته لارښوونه وکړه چې د موجوده امکاناتو په کارولو او په سیمه کې د دیني عالمانو او مخورو قومي مشرانو په همکارۍ ښوونځيو ته د نوي ماشومانو د شاملولو لپاره جدي پاملرنه وکړي.
او همدارنګه د دولسم ټولګي د زده کونکو څخه یی وغوښتل، چې د کانکور په آزموینه کې ګډون وکړي او لوړي نمري تر لاسه کړي تر څو د خپلي خوښي پوهنځي ته لاره ومومي .
