پروان ولایت کې د یوې مدرسې جوړولو چارې پیل شوې
د پروان ولایت د پوهنې ریاست راپور له مخې، د یاد ولایت د بګرام ولسوالۍ پوهنې مسوولینو، یو شمېر علماءکرامو، مخورو او روڼ اندو په حضور کې د فاطمة الزهرا رضی الله عنها مدرسې د ودانولو چارې پیل شوې.
د پوهنې مسوولینو په وینا، دغه مدرسه به په دوو پوړونو کې جوړه شي، چې د ۱۴ درسي ټولګیو سربېره به اداري خونې، تشنابونه او نورې اړینې اسانتیاوې هم ولري.
د دغې پروژې ټولیز لګښت سل زره امریکایي ډالره اټکل شوی، چې د سیمې د خلکو له مرستو څخه به تمویل شي.
د پوهنې وزارت مشرتابه د هېواد د ښوونیز نظام په ملاتړ کې د خلکو مرستې د ځانګړې پاملرنې وړ ګڼي او له دغو همکاریو څخه مننه او هرکلی کوي.
