د کابل ښار اړوندو ښوونيزو حوزو د ١٦ بابه مدارسو او ښوونځيو د زده کوونکو ترمنځ د حسن قراٸت سياليو پاى غونډه ترسره شوه
نن د کابل ښار پوهنې رياست په تالار کې، د روژې مبارکې مياشتې په مناسبت، د کابل ښار ښوونيزو حوزو اړوندو مدارسو او ښوونځيو د ١٦ تنو زده کوونکو ترمنځ د حسن قراٸت سياليو پاى غونډه په داسې حال کې ترسره شوه، چې پکې د پوهنې وزارت مالي او اداري معين محترم الحاج مولوي صبغت الله وصيل، د کيفيت تضمين معين محترم الحاج مولوي عبدالخالق صادق، يو شمېر مرکزي رٸيسانو، آمرينو، علماءکرامو او مېلمنو حضور درلود٠
د غونډې په پيل کې د کابل ښار پوهنې رٸيس محترم مولوي حسيب الله صاحب زاده ټولو درنو مېلمنو او ګډون والو ته ښه راغلاست ووايه او د حسن قراٸت د سياليو په تړاو يې بشپړ معلومات ارايه کړل٠
ورپسې د پوهنې وزارت مالي او اداري محترم معين د قرآن عظيم الشان د عظمت په هکله د خبرو ترڅنګ، په علمي ډګر کې د دغه شان سياليو ترسره کول خورا مهم وبلل او دا يې د طلابو او زده کوونکو د استعدادونو په پياوړتيا، مهارتونـو لوړولو او هڅونه کې ډېرې مهمې وګڼلې٠
دغه راز د پوهنې وزارت د کيفيت تضمين محترم معين د موضوع په هکله خبرې وکړې او ويې ويل: د دنيا او آخرت په امورو کې تر ټولو عظيم نعمت قرآن کريم دى او د دغه عظيم کلام د الفاظو او معاني دواړو برخو په زده کړه يې ټينګار وکړ٠
همدارنګه د حسن قراٸت سياليو يو تن داور محترم شيخ مبين شاه رمزي، د پورته ذکر شويو سياليو د څرنګوالي په اړه هراړخيز معلومات وړاندې کړل او د هغو پړاوونه يې ګډون والو ته تشرېح کړل٠
نوموړي زياته کړه چې له دې سياليو څخه يې اساسي موخه، د قاریانو هڅول، چمتو کول او د هغوى د نیمګړتیاو په ډاګه کول وو، ترڅو هغوى وکولای شي، دې ته ورته نورو راتلونکو سیالیو ته لاپسې چمتو شي.
په پاى کې روح الله ولد احمد سير، احمد طيب ولد کليم الله او محمود ولد محمداکبر په ترتيب سره لومړۍ، دويمه او درېيمه ممتازه درجه تر لاسه او هغوى د مسٸولينو له لوري په ډاليو او ستاينليکونو ووياړل شول٠
