دیدار معین انکشاف نصاب وتربیه معلم وزارت معارف با استادان تربیه معلم هرات

مرجان متین معین انکشاف نصاب و تربیه معلم وزارت معارف به استادان تربیه معلم ولایت هرات دیدار کرد.
در این دیدار که به روز پنجشنبه هفته گذشته انجام شد معین انکشاف نصاب و تربیه معلم وزارت معارف در رابطه به طرح تغییر وظایف تربیه‌های معلم وضاحت داد .

بانو متین در این دیدار تعهد سپرد که تربیه‌های معلم ملغا شدنی نیست بلکه طبق هدایت رییس جمهوری افغانستان وزارت‌های معارف ، تحصیلات عالی و مالیه مکلف شده اند روی طرحی کار نمایند که بر اساس آن وظایف مراکز تربیه معلم نتیجه محور گردد.

به گفته خانم متین در حال‌حاضر مراکز تربیه معلم وظیفه دارند تا بیش از 60 هزار معلم غیر مسلکی در سطح کشور را تا صنف چهاردهم ارتقای ظرفیت نمایند.

معین انکشاف نصاب وزارت معارف از استادان تربیه معلم خواست تا دیدگاه‌ها و پیشنهادات خود در رابطه به تغییر وظیفه تربیه‌های معلم با معینیت نصاب شریک سازند.

در این برنامه استادان تربیه‌های معلم ولایت هرات مشکلات خود را با معین نصاب وزارت معارف شریک ساختند .