له ولایتونو څخه د پوهنې خبرونو ته لنډه کتنه
لوګر
د لوګر ولایت پوهنې ریاست رهبري پلاوي، د یاد ولایت د ښوونځیو د کارکوونکو او ښوونکو د یوې خیریه پرېکړې په ترڅ کې، د هرات ولایت د زلزله ځپلو کورنیو سره د مرستې په موخه، د دوی ورځنی معاش چې څه باندې ۱،۲ میلیونه افغانۍ کېږي، ځانګړی کړ.
ننګرهار
د هېواد له پوهنې سره د خلکو د همکارۍ په دوام: دا ځل د ننګرهار ولایت په سرخرود ولسوالۍ کې د شیخ مصري لېسې د ودانۍ لپاره په بهر کې مېشت یوه تن هېوادوال د ۲۰۰ یورو په ارزښت مرسته وکړه.
همدارنګه:
یوه تن علم دوست هېواد وال د سرخرود ولسوالۍ د چهارباغ صفا لېسې ته شاوخوا ۷۰ متره ایرانی فرش وپېره.
په ورته ډول:
په همدې ولسوالۍ کې يو شمېر قومي مشرانو او بې وزله خلکو له خپلو شخصي شتمنيو څخه د بړینې منځني ښوونځي لپاره دروازه او کړکۍ جوړې کړې.
د ننګرهار پوهنې ریاست د ولسونو له همکارۍ څخه خوښي څرګنده کړه او دغه اقدامات یې د پوهنې د ودې نښه وبلله.
د یو بل خبر له مخې:
د ننګرهار ولایت پوهنې رئیس مفتي حبیب حضرت حقاني، د جلال آباد ښار د عربانو لېسې د زده کوونکو د زده کړې کچه او د ښوونکو د تدریس طریقې وڅېړلې او د همدې لېسې له ښوونکو سره یې د لیدنې پر مهال د درسونو پر کیفیت او د زده کوونکو پر سمې زده کړې ټینګار وکړ.
