په خوست کې د ستورپوهنې ښوونیزو سیالیو نتایج اعلان شول
د پوهنې وزارت_خوست: د "افغان ستورپوهنې علمي ټولنې" په تېرو پنځلس ورځو کې د خوست ولایت په مختلفو ښوونځیو کې د زده کوونکو تر منځ د ستورپوهنې په برخه کې د مقالو لیکلو سیالۍ ترسره کړې، چې د یوي غونډي په ترڅ کې نتایج اعلان شول.
په یاده غونډه کې د خوست مرستیال والي عبدالوحد پټان، پوهنې رئیس نصیراحمد روښان، قومي مشرانو، د لېسو امرینو، ښوونکو او زده کوونکو ګډون کړی ؤ.
د خوست پوهنې رئیس نصیر احمد روښان په خبرو کې وویل: دا ډول پروګرام د زده کوونکو د هڅونې ترڅنګ د دوی استعدادونه هم پیاوړي کوي.
پوهنې رئیس همدا راز، له افغان ستورپېژندنې علمي ټولنې مننه وکړه چې د خوستیو زده کوونکو لپاره یې دا ډول ګټور پروګرام برابر کړی ؤ او د دغه پروګرام د دوام غوښتنه یې وکړه.
د افغان ستورپېژندنې علمي ټولنې نماینده فهیم سپین غر د مراسمو ګډون والو د یادو سیالیو په هکله معلومات ورکړل او زیاته یې کړه چې، د خوست په مرکز او د ولسوالیو په ۶۷ ښوونځیو کې موږ دغه سیالۍ ترسره کړې چې له جملې یې ۳۰ ښوونځي د سیالیو ګټونکي شول، ده وویل دغه ښوونځیو ته موږ یوه پایه انعکاسي تلسکوف او سل جلده د ستورپېژندنې کتابونه د جایزې په توګه ورکوو.
ښاغلي سپین غر وویل، له دې سیالیو یې هدف د زده کوونکو ترمنځ د ساینسي مناظرو، علمي تجربو ته هڅول او په ټولنه کې د ساینس فرهنګ ته کار کول دي.
خوست مرستیال والي عبدالوحد پټان دغه سیالیو هرکلی وکړ او د ولایتي ادارې په استازیتوب یې هر ډول مادي امکاناتو د برابرولو او ملاتړ ډاډ ورکړ.
د مراسمو په پای کې د اتو مرکزي لېسو زده کوونکو ته عملا تلسکوبونه وویشل شول او د ولسوالیو مکاتبو ته به هم په خپل وخت و رسیږي.
