د خوست د یوي ښوونځي له کتابتون سره د لسګونه جلده کتابونو او قرطاسیې مرسته وشوه
پوهنې وزارت_خوست: خوست کې د "قلم لار" تعلیمي ټولنې لخوا د باک مرکزي لېسې له کتابتون سره د لسګونه جلده کتابونو او قرطاسیې مرسته وشوه.
په هغه غونډه کې چې په همدې موخه د باک لېسې په انګړ کې جوړ شوی ؤ د باک ولسوالۍ د پوهنې امر امیر بادشاه هاشمي تر څنګ د قلم لار ټولنې مشر عطاءالله ویسا او د علم مینوالو ګډون کړی ؤ. د قلم لار ټولنې مشر عطاءالله ویسا وویل، چې موږ ژمنه کوو د هېواد په هر کونج کې به د زده کوونکو سره د کتابونو او قرطاسیې همکارۍ ته داوم ورکوو، دده په وینا له دې کار یې هدف زده کړو ته د هېوادوالو خصوصا د ماشومانو هڅول دي. د باک ولسوالۍ د پوهنې امر امیر بادشاه هاشمي د قلم لار ټولنې د مشر څخه مننه وکړه چې له دوی سره یې د کتابونو او قرطاسیې مرسته وکړه، ده زیاته کړه دا مهم کتابونه به د زده کوونکو په روزنه کې خورا ګټور تمام شي.
د غونډې په پای کې د یادې لېسې په زرګونو زده کوونکو ددې ټولنې له لوري برابره شوي قرطاسیه هم وویشل شوه.
