د پوهنې وزارت او خصوصي شرکتونو ترمنځ د همغږۍ او دوهاړخیزه همکاریو غونډه جوړه شوه
د پوهنې وزارت د تدارکاتو ریاست او اړوندو ادارو له لوري له خصوصي شرکتونو سره د همغږۍ د پیاوړتیا او دوهاړخیزه همکاریو پراختیا په موخه غونډه جوړه شوه، چې د وزارت یو شمېر مسوولینو او د خصوصي شرکتونو استازو پکې ګډون درلود.
د غونډې په پیل کې د پوهنې وزارت د مقام دفتر لوی رئیس محترم شیخ محمدطاووس طارق ګډونوالو ته د ښه راغلاست ترڅنګ، د موضوع په اړه هر اړخیزې خبرې وکړې او د خصوصي شرکتونو پر مسوولینو یې ټینګار وکړ، چې خپلې دندې په پوره ژمنتیا، مسوولیتپذیرۍ او اخلاص ترسره کړي.
ورپسې د پوهنې وزارت د تدارکاتو رئیس محترم مولوي محمدعثمان حریت، د ام/ارتي ادارو او خصوصي شرکتونو ترمنځ د همغږۍ او ګډو همکاریو پیاوړتیا مهمه وبلله او د شرکتونو له استازو یې وغوښتل، چې د دوهاړخیزو همکاریو په رامنځته کولو کې خپل مسوولانه رول ادا کړي.
په ورته مهال، د خصوصي شرکتونو استازو خپلې یو شمېر غوښتنې او ستونزې له مسوولینو سره شریکې کړې، چې د وزارت چارواکو یې د حل په برخه کې د همکارۍ ډاډ ورکړ.
د غونډې په پای کې د پوهنې وزارت مالي او اداري رئیس محترم مولوي صدرالدین سعد، د خصوصي شرکتونو له استازو وغوښتل، چې په خپلو ورځنیو چارو کې رښتینولۍ، صداقت او اداري اصولو مراعاتولو ته جدي پام وکړي، ترڅو اړوندې چارې په شفاف، منظم او اغېزمن ډول پر مخ لاړې شي.
