از روز معلم، در ولایت کاپیسا تجلیل به عمل آمد

وزارت معارف_کاپیسا: از سیزدهم میزان روز جهانی معلم، طی محفل پر شکوهی باحضورداشت عبدالعلیم عیار رئیس معارف کاپیسا، داکتر عبدالقهار سروری رئیس دانشگاه البیرونی، شکیبا سیفی رئیس امور زنان، رئیس تربیه معلم، آمرین معارف، آموزگاران ذکور و اناث، و جمع کثیری از دانش آموزان تجلیل به عمل آمد.

عبدالعلیم عیار رئیس معارف کاپیسا ضمن قرائت پیام تبریکی بانو رنگینه حمیدی سرپرست وزارت معارف کشور، روز خجسته ی معلم را مبارک‌باد گفت.

آقای عیار با ابراز قدردانی از زحمات شبانه روزی از معلمان خواست تا از فرصت اندک باقی مانده جهت آموزش و تربیت نسل جدید استفاده اعظمی نمایند.

داکتر عبدالقهار سروری رئیس دانشگاه البیرونی، شکیبا سیفی رئیس امور زنان، ساره سیرت مسٶل دفتر ولایتی زنان برای زنان، استوری عصمتی رئیس تربیه معلم، شکرالله محمدی، انجنیر عبدالهادی کاکر، خاطره نظامی و سرمعلم عبدالستار از سخنرانان محفل بودند که روز خجسته معلم را مبارکباد گفته پیرامون جایگاه نیک معلم در جامعه صحبت نموده معلمان را هادی بشریت و چراغ روشن جامعه عنوان کردند.

در اخیر شماری از آموزگاران به پاس روز خجسته‌ی معلم تقدیر نامه‌های درجه سوم با مراعت جندر و حوزه‌های تعلیمی در این ولایت از سوی وزارت معارف مواصلت ورزیده بود برای شان تفویض گردید.