له ولایتونو د پوهنې فعالیتونو اړوند د ځینو خبرونو لنډیز
کابل
د کابل ولایت د پوهنې رئیس مولوي عبدالحق حقاني د پوهنې د عمومي وضعیت د څېړلو په موخه د میربچه کوټ ولسوالۍ د پوهنې آمريت ته ولاړ او د دغه امريت د اداري او تدریسي فعالیتونو د ارزونې پرمهال یې هلته د یو شمېر ښوونځیو څلورنيم مياشتنيو ازموينو له بهير څخه هم لیدنه وکړه.
همدارنګه، د کابل ولایت د پوهنې ریاست د ازادې سیالۍ په بهیر کې له ۱۸۷ تنو وړ کسانو څخه د ازادې سیالۍ په بهیر کې ازموینه واخیسته.
د دوی له منځ څخه، هغه وګړي چې لوړې نومرې ولري په دیني مدرسو کې به د استادانو په توګه وګمارل شي.
غزني
د غزني ښار يو شمېر قومي مشرانو او د ښوونځيو د شورا غړو د ياد ولايت د پوهنې رياست له مشرتابه پلاوي سره د يوې غونډې په ترڅ کې له پوهنې رياست سره د پلانونو د تطبيق په برخه کې د هر راز همکارۍ ژمنه وکړه.
پکتیا
د پکتيا ولايت د پوهنې رئيس مولوي عبدالوکيل خالد د يوې غونډې په ترڅ کې د يادې ادارې له مسوولينو او کارکوونکو څخه وغوښتل، چې د خپلو ورځنيو چارو په ترسره کولو کې اصول، دنده، همغږي او ښه اخلاق په پام کې ونيسي.
د غونډې ګډون والو هم خپلې ستونزې او غوښتنې د پوهنې ریاست له مشرتابه سره شریکې کړې او د همکارۍ غوښتنه یې وکړه.
سمنګان
د سمنګانو ولايت د پوهنې رئيس الحاج مولوي نصرت الله فيضاني او ورسره مل پلاوي د حضرت سلطان ولسوالۍ د يو شمېر ښوونيزو ادارو له تدريسي او اداري فعاليتونو څخه کتنه وکړه.
