په سرپل ولایت کې د يو باب ښوونځي پراختیا لپاره ۵۰۰ متره مربع ځمکه وقف شوه
د سرپل ولایت سانچارک ولسوالۍ اړوند د ایلنبي کلي د بيبي آمنې لومړني ښوونځي د ودې او پراختیا په موخه، د سیمې اوسېدونکو له لوري ۵۰۰ متره مربع مساحت لرونکې ځمکه وقف شوه.
د ياد ولایت پوهنې مسوولينو په وینا، دغه ځمکه د ښوونځي د بنسټیزو اسانتیاوو د پراختیا او زدهکوونکو ته د لا مناسب ښوونیز چاپېریال برابرولو لپاره ځانګړې شوې ده.
له بلې خوا، د شمس لېسې د پوهنې ملاتړي شورا او د سیمې علم پروره کسانو د همدې ولسوالۍ په کچه د یاد ښوونځي له خیریه صندوق سره د ۱۰۰ اصله سپېدارو ونو او ۱۰ زره افغانیو نغدي مرسته هم کړې ده.
د مسوولینو په خبره، دغه مرستې به د ښوونځي د درېیو تنو رضاکارو ښوونکو د معاشونو د ورکړې لپاره ولګول شي، چې له دې لارې به د ښوونیز بهیر د پیاوړتیا او دوام په برخه کې اغېزناک ملاتړ رامنځته شي.
