په کندهار کي د لاس مینځلو نړیواله ورځ ولمانځل شول
د پوهنې وزارت_کندهار: د کندهار ولایت د پوهنې ریاست او یونیسف موسسی لخوا د لاس مینځلو نړیواله ورځ ولمانځل شوه
هغه غونډه چي په همدې موخه د کندهار ولایت د مرکز اړوند د زرغونې انا اول نمبر په لېسه کي جوړه شوې وه، د پوهنې د رئیس پوهنیار محب احمد روښان ترڅنګ د ولایت مقام مشاویره اغلې ډاکټر عزیزه وطنوال، د عامي روغتیا ریاست استازو، د یونیسف مؤسسې استازو، ښوونکو او په سل ګونو زده کوونکو پکښي برخه اخیسته وه .
په غونډه کي لومړی د ولایت مقام په استازیتوب اغلې ډاکټر عزیزې وطنوال د روغتیا له اړخه د نظافت د پاک ساتلو او د لاس مینځلو پر اهمیت خبري وکړې او پر ټولو والدینو او زده کوونکو یې ږغ وکړ چي لاس مینځل د ځان او کورنۍ عادت وګرځوي ترڅو د سالمي روغتیا څخه برخمن شوي اووسو.
د پوهني رئیس پوهنیار محب احمد روښان د پوهني د وزیر ډاکټر محمد میرویس بلخي پیغام چې د همدې ورځي په مناسبت یې رالیږلی و ولوست چي د پیغام په یوه برخه کی د ټولو ښوونکو څخه غوښتنه شوې وه ترڅو په خپلو ټولګیو کي زده کوونکو ته د لاس مینځلو د ارزښت په اړه معلومات او پوهاوی ورکړي ترڅو ماشومان یې خپل عادت وګرځوي او هم یې تر خپلو کورنیو پوري ورسوي.
دغه راز د پوهني رئیس په خپلو خبرو کي وویل: که چیري وغواړو ماشومان مو وړ زده کړه ترلاسه کړي نو باید د روغ صحت څخه برخمند اووسي چي روغتیا د پاکۍ او نظافت د مراعتولو له لاري راتلای شي، چي پدې برخه کي ښوونکي مسؤلیت لري ترڅو د تدریس ترڅنګ زده کوونکو ته د نظافت د ارزښت او مراعتولو په موخه معلومات او پوهاوی ورکړي ترڅو له یو اړخه زده کوونکي د بشپړي روغتیا څخه برخمن شوي وي له بل اړخه یې وړ زده کړه ترلاسه کړي.
د عامي روغتیا ریاست په استازیتوب ډاکټر فدامحمد سحر د اړوند وزارت د وزیر ډاکټر فیروزالدین فیروز پیغام ولوست او همدا راز یې د طب د نګا څخه د لاس مینځلو د اهمیت او ارزښت په اړه خبري وکړې نوموړي پر ټولو والدینو او د کورنۍ پر مشرانو ږغ وکړ چي که غواړی اولادونه او د کورنی نور اعضا مو روغ صحت ولري نو باید هغوی پرلاس مینځلو عادت کړی ترڅو د هر ډول ناروغیو په وړاندي وقایه شوی وي او د سالمي روغتیا څخه برخمن شوي وي . ورپسې د موضوع اړوند یو شمیر زده کوونکو هم خپلي ترتیب شوي مقالې او شعرونه وویل او هم یې د موضوع په تړاو تمثلي پارچه وړاندي کړل .
