په هرات ولایت کې د ښوونکو مسلکي پراختیا غړو لپاره د وړتیا لوړولو ورکشاپ پرانیستل شو
د هرات ولایت پوهنې ریاست د ساینس مرکز د کنفرانسونو په تالار کې د یاد ولایت د ولسوالیو د ښوونکو مسلکي پراختیا ۸۳ تنو غړو لپاره د اغېزمنې زدهکړې او پوهې ترویج په موخه د وړتیا لوړولو درې ورځنی ورکشاپ پیل شو.
د ورکشاپ په لومړۍ ورځ، د پوهنې ریاست چارواکو د داسې ورکشاپونو جوړولو په اهمیت او اړتیا ټینګار وکړ او دغه ډول پروګرامونه یې د ولسوالیو پوهنې آمریتونو د علمي غړو د وړتیا لوړولو لپاره ګټور او اغېزمن وبلل.
په ورته وخت کې، د هرات پوهنې ریاست د ښوونکو د مسلکي پراختیا آمر د دغه شان پروګرام د اهدافو او محتوا په اړه خبرې وکړې او د پوهنې کارکوونکو د پیاوړتیا په برخه کې یې د داسې ورکشاپونو رول مهم او رغنده وباله.
