د هلمند ولایت پینځو ښوونځیو ته افتخاري ایوارډونه ورکړل شول
پوهنې وزارت، هلمند: د برتانیا سفارت له لوري د افغانستان په ګډون په ۱۲۵ هیوادونو کې په انلاین ډول د پوهنیز کیفیت لوړونې په موخه کلنۍ سیالۍ ترسره کیږي، چي ګڼ شمیر زده کوونکي، ښوونکي او د ښوونځیو مدیران په کې ګډون کوي.
د همدې پروګرام په لړ کې د هلمند ولایت پنځو ښوونځیو ته د برټیش کونسل له لوري افتخاري ایوارډونه او ستاینلیکونه ورکړل شول.
د هلمند د پوهنې رئیس محمد داؤد شاه صفاري د دې جایزو او ایوارډونو پر تر لاسه کولو خوښي څرګنده کړه او وې ویل: د هلمند لپاره دا ستر ویاړ دی چي ښوونځیو ته یې د یوې باوري ادارې له لوري ایوارډونه ورکول کیږي.
د پوهنې رئیس زیاته کړه: موږ د زده کړییز کیفیت د لوړونې په موخه بنسټیزې هڅې ترسره کوو، څو په مرکزي ښوونځیو کې زده کړییز کیفیت وده وکړي او زده کوونکو ته د معیاري زده کړو زمینه برابره شي.
صفاري د پوهنې په برخه کي د یو شمیر ستونزو یادونه وکړه او ټینګار یې وکړ، چي د دې ستونزو د حل په پار به چټک ګامونه پورته کوي، نوموړي په دې برخه کي د ولایتي ادارې، مرکزي حکومت او اولس همکاري اړینه وبلله.
د هلمند مرستیال والي بریالي نظري د زده کړییز کیفیت لوړونې په برخه کې د نړیوالو بنسټونو او ادارو ملاتړ مهم وګڼه او د پوهنې ریاست څخه یې غوښتنه وکړه، چي په دې برخه کې له نړیوالو ادارو سره خپلو همکاریو ته دوام ورکړي.
ښاغلي نظري وویل: د هلمند ولایتي اداره د معارف د ودې برخه کې د جدي اصلاحاتو او سمونو ملاتړ کوي، همداراز د ستونزو د حل لپاره کوټلي ګامونه پورته کوي.
هیره دې نه وي چې، د غونډې په پای کې د پینځو ښوونځیو مدیرانو او ښوونکو ته د برتانیا سفارت له لوري جوړ شوي افتخاري ایوارډونه او ستاینلیکونه ورکړل شول.
