د کابل ښار ښوونځيو فوټسال لوبډلو ترمنځ د سیالیو پایلې اعلان شوې
څه موده وړاندې د پوهنې وزارت د اساسي او ثانوي زده کړو رياست له لوري د خزاني ټورنمنټ په چوکاټ کې، د کابل ښار ښوونځيو د سپورټي لوبډلو ترمنځ د فوټسال سيالۍ په لاره واچول شوې، چې اوس یې پایلې د پوهنې مسئولینو، روزونکو او د سپورټ مینه والو په حضور کې اعلان شوې. د دغو سیالیو پایلوبه د حبيبيې او اماني لېسو د لوبډلو ترمنځ ترسره شوه، چې په پايله کې د حبيبيې عالي لېسې لوبډله وتوانېده، تر څو د یادو سياليو په لړ کې لومړی مقام ترلاسه کړي. ورپسې د اماني او نادریه لېسو لوبډلو په ترتیب سره دویم او درېیم مقامونه خپل کړ. د ياد ټورنمنټ پر ممتازو لوبډلو د جايزو او ډاليو د وېشلو په ترڅ کې مسئولينو يادونه وکړه، چې پوهنې وزارت د هېواد بچیانو او ځوانانو روغتيا ته ځانګړې پاملرنه کوې او په یاده برخه کې د همدغه وزارت هلې ځلې دوام لري. دغه مراسم د پوهنې وزارت د اساسي او ثانوي زده کړو ریاست د بدني روزنې مسئولینو له خوا ګټونکو لوبډلو ته د جایزو په وېشلو سره پای ته ورسېدل.
