د پوهنې وزارت د احصائیې او معلوماتو رئیس کاپیسا ولایت ته ولاړ
د پوهنې وزارت د احصائیې او معلوماتو رئیس الحاج مولوي بسم الله«نعماني» د یو تخنیکي ټېم په ملتیا، د کاپیسا ولایت په مرکز او ولسوالیو کې د پوهنې ریاست مسئولینو، د کیفیت تضمین آمریت کارکوونکو او د پوهنې آمریتونو
غړو لپاره، د ارقامو او احصائیوي معلوماتو د راټولولو په موخه د وړتیا لوړونې روزنیز سیمینار پرانیست.
ورپسې د پوهنې وزارت د احصائیې رئیس په هغه غونډه کې ګډون وکړ، کوم چې د احصائیې څانګې د ۳۱۰ تنو کارکوونکو، د مرکز او ولسوالیو د ښوونیزو ادارو مسئولینو ته د مسلکي وړتیا لوړولو په موخه جوړه شوې وه.
د غونډې په پيل کې د کاپیسا پوهنې رئيس الحاج مولوي محمد فرید حقاني ورغلي پلاوي ته د ښه راغلاست ترڅنګ، د تعلیمي بنسټونو د کارکوونکو او مسئولينو لپاره د دغه ډول سيمينارونو جوړېدل ضروري او دایې په تعلیمي ډګر خورا اغېزمن وبلل.
د پوهنې وزارت د احصایې رئیس په خپلو خبرو کې وویل، د بودیجې د مصرف د روڼتیا او نورو اړوندو مسایلو په ګډون په ټولو ادارو کې د دقیقو احصایو درلودل مهم او اړین دي.
نوموړي څرګنده کړه: د کارکوونکو د کاري او مسلکي وړتیاوو لوړول د چارو د لاپرمختګ يو اساسي عامل دى او له ګډون والو يې وغوښتل چې د ياد پروګرام له منځپانګو څخه سمه ګټه پورته کړي.
د يادونې وړ ده، چې دغه سيمينار د یاد ولايت په ټولو ولسواليو کې پيل شوى، چې د مسئولينو له خوا يې څارنه کېږي.
