لوګر کې د حی علی الفلاح دیني سیالۍ مخکښ زده کوونکي وستایل شول
په لوګر ولایت کې د حی علی الفلاح په نوم د سیرت پېژندنې په سیالۍ کې د لوړو نومرو ګټونکي زده کوونکي وستایل شول.
د نوموړو زده کوونکو د ستایلو په غونډه کې تدریسي مرستیالې مینې سادات، د مالي او اداري چارو مرستیال وزیر احمد مهمند، دیني عالمانو، قومي مشرانو او زده کوونکو برخه اخیستې وه.
یادې سیالۍ یوه اوونۍ مخکې د لوګر نوین د خصوصي ښوونځي په مالي مرسته د نجونو او هلکانو په ۹۰ ښوونځیو کې په لاره اچول شوې وې.
په نوموړو دیني سیالیو کې د ۲۰۰ نجونو په ګډون ۱۵۰۰ زده کوونکو پکې ګډون کړی و، چې د بیلا بیلو ټولګیو زده کوونکي وو.
په دغو سیالیو کې د محمدي دارالعلوم زده کوونکي ثناء الله لومړۍ، د لوګر نوین خصوصي ښوونځي زده کوونکي سمیع الله دویم او د دارلهدیٰ خصوصي ښوونځي زده کوونکي عبدالقهار دریم مقامونه خپل کړي دي.
د غونډې په پای کې یاد درې مخکښ او دغه راز ۳۳ نور زده کوونکي د لوګر نوین د خصوصي لېسې له خوا پر ستاینلیکونو او بیلا بیلو سوغاتونو وستایل شول.
