پکتیکا ولایت کې د ۸۰ مېلیونه افغانیو په لګښت د یوې مدرسې او ۹ بابه ښوونځیو د ودانیو جوړېدو چارې پیل شوې
د افغانستان ا.ا د عالیقدر امیرالمؤمنین (حفظه الله) د لارښوونې پر بنسټ، د هېواد لرو پرتو او محرومو سیمو ته د ښوونیزو مرکزونو د پراخولو په موخه، پوهنې وزارت له لوري د پکتیکا ولایت په پینځو سرحدي ولسوالیو (وازېخوا، اوړمې، تروې، برمل او شکین) کې د یوې مدرسې او ۹ بابه ښوونځيو د ودانیو رغولو چارې د ۸۰ مېلیونه افغانیو په لګښت د یو لړ مراسمو په ترڅ کې پیل شوې.
د يادو پروژو د پرانیستنې په مراسمو کې د پکتيکا ولايت والي مولوي عبدالخالق عابد، پوهنې رئيس مولوي عبدالوکيل خالد، علماءکرامو او د سیمه ییزو ادارو يو شمېر مسئولينو برخه اخيستې وه.
په پیل کې د یاد ولایت والي وویل: ا.سلامی امارت ژمن دی، تر څو د پوهنې په ګډون په ټولو برخو کې خپلو هېوادوالو ته ښه چوپړونه وړاندې کړي.
نوموړي زیاته کړه، «موږ په پکتیکا ولایت کې د پوهنې وزارت له ټولو پلانونو او پروګرامونو څخه بشپړ ملاتړ کوو او د هغو په پلي کولو کې د هراړخیزې همکارۍ ډاډ ورکوو.»
همدارنګه نورو ويناوالو د ټولنې په اصلاح او د هېواد په پرمختګ کې د ښوونې او روزنې ګټې بيان کړې، ویې ويل: د هېواد د پرمختګ او سوکالۍ يوازینۍ لاره د باکيفيته ښوونيز نظام شتون دى او موږ د پوهنیز نظام په پیاوړتیا او بډایه کولو کې د پوهنې وزارت د مشرتابه له هڅو مننه کوو.
په ورته مهال د خلکو يو شمېر استازو او علماءکرامو هم د پوهنې وزارت کړنې وستايلې او له هغوی يې خپل ملاتړ اعلان کړ.
د يادونې وړ ده، چې د ځانګړې پلان له مخې به د يادو ښوونیزو مرکزونو د جوړېدو چارې تر شپږو کاري میاشتو وروسته ګټې اخيستنې ته چمتو شي.
