په لغمان ولایت کې د یوې دیني مدرسې جوړولو لپاره ځمکه وقف شوه
د لغمان ولایت قرغه يي ولسوالۍ اړوند د خالق آباد کلي علم پروره اوسېدونکو د یو میلیون او ۵۰۰ زره افغانیو په ارزښت ۱۵ بسوې شخصي ځمکه " د جامعه دارالعلوم اسلاميه العربيه" مدرسې لپاره د ودانۍ جوړولو په موخه، د ياد ولایت پوهنې ریاست ته وقف کړه.
په يادو مراسمو کې د پوهنې مسئولينو، ديني علماوو او قومي مخورو ګډون درلود.
د سيمې خلکو د هېواد له پوهنيز نظام سره پر خپل ملاتړ د ټينګار ترڅنګ ژمنه وکړه، چې په نيږدې راتلونکي کې به له خپلو شخصي شتمنيو څخه د دغه مدرسې ودانۍ ورغوي.
د پوهنې وزارت مشرتابه د هېواد له پوهنيز نظام سره د لغمان ولایت د قرغه يي ولسوالۍ د خلکو د ملاتړ او مرستو له امله مننه وکړه.
د ياد ولايت پوهنې رئيس مولوي شاه جهان ساجد د خپلو خبرو په ترڅ کې له پوهنې سره مرسته يو صدقه جاريه عمل وباله.
د يادونې وړ ده، چې د دغه ودانۍ په جوړېدو سره به شاوخوا ۱۲۰ تنو ماشومانو ته د زده کړو خوندي چاپېريال رامنځته شي.
