د پروان ولایت په سیدخېلو ولسوالۍ کې یو باب الحاقیه فعاله شوه
د پروان ولايت سيدخېلو ولسوالۍ اړوند د حمزه خېلو په کلي کې د نجونو ښوونځي یو باب الحاقیه، د يو لړ مراسمو په ترڅ کې چې د یادې ولسوالۍ ولسوال، د پوهنې مسئولينو، علماوو او د سيمې خلکو پکې ګډون درلود، ګټې اخیستنې ته وسپارل شوه.
د پروان ولايت پوهنې رياست مسئولين وايي: پخوا ياده الحاقیه د عبدالقيوم شهيد لېسې پورې اړوند وه او د سيمې د اوسېدونکو د اړتياوو او وړانديزونو له مخې، د يادې لېسې څخه جلا او د نجونو په څانګه پورې وتړل شوه.
د یاد ولايت پوهنې رئيس مولوي سيد محمد په خپلو خبرو کې وويل: د پوهنې وزارت د هېواد ماشومانو لپاره د زده کړو په برخه کې آسانتیاوو برابرولو ته ژمن دى او له خلکو يې وغوښتل، تر څو د پوهنې د بډاينې او پراختیا په موخه، له ښوونیز نظام سره خپلو همکاریو ته دوام ورکړي.
د يادونې وړ ده، چې د يادې الحاقیې په جوړېدلو سره ګڼ شمېر نجونو ته د زده کړو آسانتیا برابره شوه.
د سيمې اوسېدونکو هم په خپل کلي کې د يوه ښوونځي د څانګې د جوړېدو هرکلى وکړ او ويې ويل، چې دوى به خپل ماشومان د زده کړو په موخه دغه ښوونځي ته واستوي.
