له مرکز او ولایتونو څخه د پوهنې څو لنډ خبرونه
بغلان
د بغلان ولايت په مرکز پلخمري ښار کې د سيدجمال ښوونځي د احاطوي دېوال د بنسټ ډبره، د هېواد د کرېکټ د ملي لوبډلې د يوه لوبغاړي « فضل حق فاروقي » په مالي مرسته کېښودل شوه.
کابل
د کابل ښار پوهنې رئیس قاري عبدالباسط حقاني او ورسره مل پلاوي د لومړۍ، دوبمې، درېیمې او شپږمې ناحیو له مسئولینو څخه د دوی د ښوونیزو کړنو له امله څارنه او کتنه وکړه.
بغلان
د بغلان ولايت پوهنې رئيس الحاج مولوي محمد نورعزيزي، د یاد رياست د ټولو څانګو مسئولينو ته لارښوونه وکړه چې د پوهنې وزارت د پروګرامونو او نورو لارښوونو له مخې خپلې کړنې ترسره کړي او له مراجعينو سره له غفلت او نامناسب چلند څخه ډډه وکړي.
بدخشان
د بدخشان ولايت پوهنې رياست د ښوونکو د مسلکي پراختیا د علمي غړو د ٥٦ بستونو د ډکولو په موخه، د آزادې سیالۍ پروسه ترسره کړه، تر څو وړ کسان په یادو بستونو کې وګمارل شي.
