د څو ولایتونو له پوهنې ډګره لنډ خبرونه
ننګرهار
د پوهنې يوې ملاتړ ادارې په ننګرهار ولايت کې د ۲۸ زره ډالرو په ارزښت، د ياد ولایت په مرکز جلال آباد ښار کې د استقلال عالي لېسې لپاره د اوبو ذخیره او اړين محلقات ورغول.
د ننګرهار پوهنې رئیس مفتي حبیب حضرت حقاني د یادې ادارې له مرستو مننه وکړه.
کندز
په دې وروستيو کې مولوي عبدالحليم د کندوز ولايت د ج/هادي مدرسې د مهتمم په توګه وګمارل شو او د هغو مراسمو په ترڅ کې چې پکې د ياد ولايت پوهنې مشرتابه او د ولايت مقام مرستيال مولوي عبدالغفور شهيدزوی ګډون درلود؛ خپلو همکارانو ته ور وپېژندل شو.
کابل
د کابل ولايت پوهنې رياست وايي: د ياد رياست له بوديجې څخه د ۱۶۱ زره ۴۵۳ افغانيو په ارزښت، د دغه رياست د مرکزي دفترونو اداري وسايل ترميم او ورغول شول.
نيمروز
د نیمروز ولایت پوهنې رئیس الحاج مولوي ګل احمد حقاني د چهار برجک ولسوالۍ د یو شمېر ښوونځیو او دیني مدارسو اداري او تدریسي چارې له نيږدې وکتلې او د کړنو لاښه والي په موخه یې ورته لازمې سپارښتنې وکړې.
سرپل
د سرپل ولایت پوهنې ریاست د ياد ریاست په څانګو کې د ۵ تش بستونو د ډکولو په موخه، له نوماندانو رقابتي آزموینه واخیسته.
