د مرکز او ولایتونو څخه د پوهنې له کړنو انعکاس
پکتیکا
د پکتیکا ولایت ارګون ولسولۍ اړوند د ابو هریره(رضي الله عنه) دارالعلوم له لویې دورې څخه ۵ تنه، له وړې دورې ۱۰ تنه، د قرآن کریم د حفظ دورې څخه ۱۳ تنه زده کوونکي فارغ شول او د یو لړ شانداره مراسمو په ترڅ کې، چې پکې د پوهنې مسئولینو، دیني علماوو، مشرانو او د خلکو استازو ګډون درلود، د یاد ولایت پوهنې ریاست مشرتابه له لوري په ډاليو او ستاینلیکونو وویاړل شول.
کابل ښار پوهنې ریاست
د افغاني سرې میاشتې ټولنې، د کابل ښار په اوومه ناحیه کې د دوو لېسو لپاره په سولر سیستم سبمالې دوه څاه ګانې وکیندلې او د یو لړ مراسمو په ترڅ کې یې د کابل ښار پوهنې رئیس او یو شمېر مسئولینو په ګډون ګټې اخیستنې ته وسپارلې.
د کابل ښار پوهنې رئیس قاري عبدالباسط حقاني، د یادې ټولنې له مرستې مننه وکړه او د نورو ښوونیزو ادارو لپاره یې د مرستو د دوام غوښتنه وکړه.
کابل
د کابل ولایت پوهنې ریاست او د پلټنې عالي ادارې ترمنځ د همغږۍ غونډه جوړه شوه.
د کابل ولایت پوهنې رئیس مولوي عبدالحق حقاني او د پلټنې عالي ادارې رئیس مولوي عبدالاحد قیومي د یاد ولایت د پوهنې چارو لاښه والي په موخه، د دوه اړخیزه همکاریو او لا زیاتې همغږۍ په اړه خبرې اترې وکړې.
پکتیا
د پکتیا ولایت پوهنې ریاست اداري غونډه د یاد ولایت پوهنې رئیس مولوي عبدالوکیل خالد تر څارنې لاندې د سیمه ییزو ادارو او مرستندویه بنسټونو د مسئولینو په ګډون جوړه شوه.
د غونډې ګډون والو د خپلو کړنو راپورونه وړاندې او د راتلونکو پلانونو په اړه یې معلومات ورکړل.
لغمان
د لغمان ولایت پوهنې رئیس مولوي شاه جهان ساجد، د یاد ولایت مرکزي دارالاېتام د ښوونیز وضعیت لاښه والي په موخه، د زده کوونکو او ښوونکو ستونزې او وړاندیزونه واورېدل.
همدارنګه نوموړي د مسئولینو او ښوونکو له هڅو مننه او قدرداني وکړه.
