د پوهنې وزارت د راپور ورکونې څانګو کارکوونکو لپاره د ظرفیت لوړونې سیمینار دایر شو
د پوهنې وزارت د کیفیت تضمین معینیت د څارنې او ارزونې ریاست د مسئولینو له لوري د یاد وزارت د مرکزي ریاستونو د راپور ورکونې څانګو کارکوونکو لپاره، د ظرفیت لوړونې سیمینار جوړ شو.
یاد سیمینار د قرآن عظیم الشان د څو مبارکو آیتونو په تلاوت سره پیل شو.
ورپسې د پوهنې وزارت د معلوماتو او احصایې رئیس مولوي بسم الله نعماني، د مرکزي ریاستونو د راپور ورکونې څانګو د مسلکي کارکوونکو ظرفیت لوړولو په برخه کې د یاد سیمینار اغیزمنتیا ته په اشارې وویل، چې په دې سره به یاد کارکوونکي د فورمو او اسنادو پر چمتووالي سربېره د نوي الکترونیکي سیستم سره هم آشنا شي او له هغوی یې وغوښتل، ترڅو په ننني سیمینار کې له وړاندې شویو موضوعاتو څخه اعظمي ګټه پورته کړي.
همدارنګه د غونډې آجنډا د یاد ریاست د کارپوه او روزونکي شرف الدین شرف له لوري د یاد سیمینار ګډون والو ته تشرېح او د روزونکو لخوا د علمي پرېزنټېشنونو په وړاندې کولو سره د سیمینار کار په رسمي توګه پیل شو.
د يادونې وړ ده، چې ياد سيمينار به سبا هم دوام وکړي او په پای کې به پر ګډون والو تصدیق پاڼې هم ووېشل شي.
