په لوګر ولایت کې د یو ښوونځي د بنسټ ډبره کېښودل شوه
د پوهنې له لویې کورنۍ سره د خلکو د مرستې او همکارۍ په دوام، دا ځل د لوګر ولایت د پوهنې دوست یو شخصیت د یاد ولایت مرکز اړوند د هارون خېلو په سیمه کې یو باب ښوونځی جوړوي.
د یاد ښوونځي د بنسټ ډبره د لوګر پوهنې ریاست مشرتابه پلاوي، علماوو، قومي مشرانو او د ښوونځي د زده کوونکو په ګډون د یو لړ مراسمو په ترڅ کې کېښودل شوه.
د معلوماتو له مخې د یاد ښوونځي ټول لګښت یو میلیون افغانۍ اټکل شوی، چې د همایون بهادر او د هغه د کورنۍ له لوري ورکول کیږي.
د لوګر پوهنې ریاست او د هغه ولایت قومي مشرانو د ښاغلي بهادر د کورنۍ دغه کړنه وستایله او دا یې صدقه جاریه وبلله.
په پام کې ده چې د ياد ښوونځي د جوړېدو چارې د دوو مياشتو په موده کې بشپړې او شاوخوا ۴۰۰ زده کوونکو ته به د زده کړې سالم چاپېريال برابر شي.
