له ولایتونو څخه د پوهنې لنډ خبرونه
نیمروز
مولوي عبدالغني شفیق د نیمروز ولایت د پوهنې ریاست د اسلامي زده کړو د نوي آمر په توګه معرفي شو.
د دې ولايت د پوهنې رئيس مولوي ګل احمد حقاني د يادې شوې ادارې کارکوونکو ته د مبارکۍ او ورپېژندلو په ترڅ کې له نوموړي وغوښتل، چې خپلې ورځنۍ چارې د پوهنې له رياست سره په پوره همغږۍ ترسره کړي.
لوګر
د لوګر د پوهنې ریاست په وړاندیز د اداري او تدریسي چارو د ښه والي په موخه او د پوهنې وزارت په منظورۍ د دې ادارې ۱۳ تنه کارکوونکي چې په بېلابېلو بستونو کې یې کار کاوه، تغیر او تبدل شول.
دغه بدلونونه د دې ولايت د پوهنې رياست د مشرتابه پلاوي او د سيمه ييزو رياستونو د نورو مسوولينو په ګډون د يوې لويې غونډې په ترڅ کې اعلان شول.
د لوګر ولايت د پوهنې رئيس مولوي جنت ګل عزيز په دولتي ادارو کې تغیر او تبدیل یې يو اصل وباله او له تبدیل شويو کسانو يې وغوښتل چې په خپلو ورسپارل شويو چارو کې ښه کار وکړي.
ننګرهار
د ننګرهار ولایت د پوهنې رئیس مفتي حبیب حضرت حقاني د پوهنې وزارت له مالي او اداري ریس سره وکتل.
په دې کتنه کې د پوهنې وزارت مالي او اداري ریس د دغې ادارې د فعالیتونو ستاینه وکړه.
د یاد ولایت د پوهنې رئیس د خوښۍ د څرګندولو تر څنګ وویل چې د پوهنې وزارت مشرتابه په دغه ولایت کې د پوهنې د بهیر د پیاوړتیا لپاره ژمنه ده، له راغلي پلاوي سره یې د پوهنې په برخه کې شته ستونزې شریکې کړې.
پروان
د پروان ولایت د سیدخېلو ولسوالۍ د شهید مولوي عبدالشکور شبیر د دارالحفاظ او د امام محمد شیباني له دارالعلوم څخه او د لویې او وړې دورې په کچه د فاضلانو او حافظانو له فراغت څخه نمانځل وشوه.
په دې غونډه کې د پوهنې رئيس مفتي محمد حسن حقاني او نورو ويناوالو د فاضلانو او حافظانو د فراغت له امله مبارکي وويله او زياته يې کړه: په هېواد کې له دارالعلومونو، مدارسو او دارالحفاظونو څخه اصلي موخه په شرعي او دیني علومو کې د ځوان نسل روزنه ده.
کندهار
د کندهار ولایت په خاکریز ولسوالۍ کې د سواد زده کړې له ټولګیو څخه ۷۹ تنه زده کوونکي فارغ شول. دغو فارغانو ته په ۹ میاشتو کې د لیکلو او لوستلو روزنه ورکړل شوه.
د دې ولایت د پوهنې آمریت د سواد زده کړې مسوولینو فارغانو ته د مبارکۍ ویلو پرمهال هغوی یې لازیاتې زده کړې ته وهڅول.
