دایکنډي ولایت کې د څلورو غوره ښوونکو ستاینه
پوهنې وزارت، دایکنډي: دایکنډي ولایت کې د یاد ولایت د پوهنې رئیس رحمت الله سیرت او د دې ریاست د نورو کارکونکو له لوري د یاد ولایت څلور تنه ښوونکي د یوې غونډې په ترڅ کې، د هغوی د ارزښتناکه هلو ځلو په پار وستایل شول. چې اشترلي ولسوالۍ کې د کمان پیشدرم ښوونځي ښوونکې آغلې فهیمې اکبري ته د ملالۍ مډال، سنګ تخت ولسوالۍ کې د نوید پیروزي، د نجونو ښوونځي ښوونکي علي اکبر ته لومړۍ درجه ستاینلیک او په همدې ترتیب، خدیر ولسوالۍ کې د شینه کالوي ښوونځي ښوونکي حافظ حجت ته دویمه درجه او په کجران ولسوالۍ کې د باغبان ښوونځي ښوونکې ام البنین ته دریمه درجه، ستاینلیکونه ورکړل شول.
د دې غونډې په ترڅ کې د یاد ولایت د پوهنې رئیس وویل: چې د دولتي کارکوونکو ستاینه زموږ لپاره یو مهم اصل دی، چې یاده چاره د دوی د ارزښتناکه هلو ځلو د ستاینې په موخه ترسره کیږي، نوموړي زیاته کړه په یاد ولایت کې د یوه شفاف بهیر په ترڅ کې هغه ښوونکي کې چې د زده کوونکو د ښوونې او روزنې په برخه کې یې ډیرې هلې ځلې کړې وې له هغو څخه درې غوره ښوونکي په ستاینلیکونو او مډالونو وستایل شول او نوموړو ښوونکو ته یې د یادې بریا مبارکي ورکړه.
پاتې دې نه وي چې په یادې غونډې کې د ښوونکو په استازولي، یوه ښوونکي د پوهنې د وزارت له لوري د دې ولایت د ښوونکو د ستاینې په پار، خوښي څرګنده کړه او مننه یې وکړه.
