د پوهنې وزارت د څارنې او ارزونې رئیس بغلان ولایت ته سفر وکړ
د پوهنې وزارت د څارنې او ارزونې د رئیس محترم مولوي غلام ربي رباني په مشرۍ پلاوي بغلان ولایت ته سفر وکړ او هلته یې د پوهنې له مسوولینو سره په یوه غونډه کې لیدنه او خبرې وکړې.
د غونډې په پیل کې، د بغلان ولایت پوهنې رئیس محترم مولوي سید حفیظالله معتصم بالله پلاوي ته د ښه راغلاست ترڅنګ، د ښوونیزو او اداري فعالیتونو د عمومي وضعیت، د کاري پلانونو د تطبیق بهیر، د بېلابېلو څانګو د کړنو او په مرکز او اړوندو واحدونو کې د چارو پرمخ بېولو په اړه معلومات وړاندې کړل.
همدارنګه، د پوهنې وزارت پلاوي د بېلابېلو برخو د مسوولینو راپورونه او معلومات واورېدل او د مسوولیتپالنې، د ادارو ترمنځ د همغږۍ، د چارو د منظم تعقیب، د کاري پلانونو د دقیق تطبیق او د پوهنیزو فعالیتونو کیفیت او اغېزمنتیا ته د جدي پاملرنې پر اړتیا یې ټینګار وکړ.
