د پوهنې وزارت د نن ورځې مهمو کړنو ته لنډه کتنه
۱- د ګرمو سیمو او ولایتونو د نوي ښوونیز کال د پیل په مناسبت، د هلمند ولایت د مرکز او ولسوالیو اړوندو ښوونځیو زدهکوونکو او ښوونکو ته د قرطاسیې او ښوونیزو مرستندویه کڅوړو وېش بهیر پیل شو.
۲- د پکتیکا ولایت سروبي، تروې، وازېخوا او اومنې ولسوالیو پوهنې آمریتونو اړوندو ۶۴ تنو اداري کارکوونکو لپاره د مسلکي وړتیا لوړونې شپږ ورځنۍ برنامې ترسره شوې.
۳- د پکتیا ولایت پوهنې ریاست له لوري د راستنېدونکو کډوالو ماشومانو د تعلیمي کچې د تثبیت په موخه له ۱۶ تنو ماشومانو څخه د تعلیمي سویې د تثبیت ازموینه واخیستل شوه.
۴- د دایکنډي ولایت کیټي او کجران ولسوالیو اړوندو ښوونځیو د ښوونکو مسلکي ظرفیت لوړولو او د تدریسي کیفیت ښه والي په موخه، د ۳۵ تنو ښوونکو لپاره د «اغېزمنې ښوونې او زدهکړې ترویج» تر سرلیک لاندې درې ورځنۍ روزنیزې برنامې پيل شوې.
۵- د غوره ښوونیزو اسانتیاوو برابرولو په موخه، د یو تن علمپرور شخصیت ښاغلي غلام ایشان ملکزاده له لوري د پنجشیر ولایت حصه اول ولسوالۍ اړوند پوهنې له آمریت سره د ۱۰۰ زره افغانیو په ارزښت د قرطاسیې او درسي توکو مرسته وشوه.
۶- د پوهنې وزارت له بودیجې څخه د کابل ښار پوهنې ریاست اړوند یوه ۸ خونیزه ودانۍ د ۷۸۲ زره او ۴۷۰ افغانیو په لګښت ترمیم او بیارغول شوې، چې د پوهنې وزارت د کیفیت تضمین معین الحاج مولوي عبدالخالق صادق او د کابل ښار پوهنې مسوولینو په حضور کې بېرته ګټې اخیستنې ته وسپارل شوه.
