د پوهنې وزارت له لوري د مرکز او ولسوالیو په کچه ۱۰۶۰ اداري بستونه ازاد رقابت ته وسپارل شول
د پوهنې وزارت لخوا، د اطلاعاتو او رسنیو مرکز په تالار کې ۱۰۶۰ اداري بستونه د یاد وزارت د مشرتابه، د بېلابېلو وزارتونو د مسوولینو، مرکزي رئیسانو او د رسنیو د استازو په حضور کې د ازاد رقابت پروسې ته وسپارل شول.
غونډه د قرآنعظیمالشان د څو مبارکو آیتونو په تلاوت سره پیل شوه؛ ورپسې د پوهنې وزارت د کیفیت تضمین معین محترم الحاج مولوي عبدالخالق صادق، ګډونوالو ته د ښه راغلاست ترڅنګ وویل: دا ځل هم د لا زیات شفافیت د تأمین او د مجربو او وړ کادرونو ګومارنې په موخه، د مرکز، ولسوالیو او ښوونیزو حوزو اړوند د پوهنې۱۰۶۰ اداري بستونه په رسمي ډول اعلان ته سپارل کېږي، ترڅو وړ، مسلکي او مستحق کسان وکولای شي، د ملک د پوهنیز نظام لا پیاوړتیا او اغېزمنتیا لپاره خپل اسلامي او ملي مسوولیت ادا کړي.
نوموړي زیاته کړه:«پوهنې وزارت د دولت په تشکیلاتي جوړښت کې د زړه حیثیت لري؛ که د پوهنې برخه پیاوړې شي، نو د نظام ټولې برخې به ورسره پیاوړې، منظمې او باکیفیته شي.»
هغه ټینګار وکړ، چې په دغو بستونو کې به قومپالنه، ژبپالنه، سمتپالنه او نژادپالنه هېڅ ډول ځای ونه لري، بلکې اصلي معیار به پوهه، وړتیا، لیاقت او استعداد وي.
همدارنګه د کارکوونکو چارو لوی رئیس محترم مفتي شفېع الله منصور د پورته ذکر شویو بستونو په اړه هر اړخیز معلومات وړاندې کړل او ولس ته یې ډاډ ورکړ، چې د ازموینې ټوله پروسه به په بشپړ شفافیت، عدالت او امانتدارۍ ترسره کېږي.
په همدې حال کې د کار او ټولنیزو چارو وزارت د کار معین، محترم الحاج مولوي محمدزاهد احمدزي، د پوهنې وزارت له دغه نېک اقدام څخه د ستایلو سربېره په خپلو خبرو کې وویل: د اړوند وزارت له مهمو کاري پلانونو څخه یو هم د ځوانانو او د هېواد د بېکاره قشر لپاره د کاري فرصتونو برابرول دي. نوموړي زیاته کړه، چې اوسمهال د همدې موخې ترلاسه کولو لپاره په ټول ملک کې شاوخوا ۵۲ زره حرفوي او مسلکي مرکزونه فعال دي، ترڅو ځوانانو ته تخنیکي او مسلکي زده کړې برابرې کړي.
غونډه د پوهنې وزارت د مقام د دفتر لوی رئیس محترم شیخ محمدطاووس طارق له لوري په مبارکي دعائیې سره پای ته ورسېده.
