له کابل او ننګرهار ولایتونو څخه د پوهنې څو لنډ خبرونه
کابل
د کابل ولایت پوهنې رئیس الحاج مولوي عبدالسلام شعیب، د یاد ولایت د حج او اوقافو رئیس مولوي شریف الله خادم په ملتیا، د چهاراسیاب ولسوالۍ پوهنې آمریت څخه لیدنه وکړه او چارواکو ته یې د دوی د مکلفیتونو او مسئولیتونو څخه خبر ورکړ.
د یو بل خبر له مخې:
د کابل ولایت د چهاراسیاب، بګرامي، ده سبز، خاک جبار، سروبي او موسهي ولسوالیو د ښوونځیو د ۱۱۱ تنو غوره زده کوونکو ترمنځ د ساینسي مضمونونو سیالي پیل شوه.
کابل ښار
د کابل ښار پوهنې ریاست سره په همغږۍ، یوې تعلیمي ادارې په پنځمه ناحیه کې د رسمي او خصوصي ښوونځیو او صنفي اصولو ۳۱۰ تنو ښوونکو ته "په اسانۍ سره د قرآن کریم تدریس" په اړه پنځه ورځنی سیمینار جوړ کړ.
ننګرهار
د پوهنې یوې مرستندویه ادارې د ننګرهار ولایت زده کوونکو ته د ۲۳۴زره ۲۴۰ افغانیو په لګښت د لیکلو مواد لکه ۶،۳۰۰ کتابچې، ۴،۷۰۰ دوسیې او ۳،۹۴۸ قلمونه توزېع کړل.
