د پوهنې وزارت پلاوي په دایکنډي ولایت کې د ښوونکو له روزنیز ورکشاپ څخه لیدنه وکړه
د پوهنې وزارت د ښوونکو د نصاب او مسلکي پراختیا لوی رئیس محترم الحاج مولوي اول ګل ایوبي او د دایکنډي ولایت پوهنې رئیس الحاج مولوي رحمت الله قندیلي له لوري، د یاد ولایت په سنګتخت او بندر ولسوالیو کې د ښوونکو د مسلکي وړتیاوو لوړولو په اړه له شپږ ورځنی روزنیز ورکشاپ څخه څارنه او بیاکتنه وشوه.
یاد پلاوي د ورکشاپ پرمختګ، د روزنې په پروسه کې د اړونده ټیم د کاري مېتودونو، د ښوونکو د فعال ګډون، د موادو وړاندې کولو کیفیت او د تعلیمي توکو کارول وارزول.
د لیدنې په جریان کې، د یاد ولایت پوهنې رئیس ټینګار وکړ: "چې دغه ډول د پیاوړتیا پروګرامونه په ښوونځیو کې د تعلیمي او مدیریتي کیفیت ښه کولو کې کلیدي رول لوبوي او پوهنې ریاست ژمن دی چې د پوهنې وزارت لخوا د ټاکل شويو موخو سره سم داسې پروګرامونه پلي کړي."
د دې لیدنې پایلې ښیې چې ګډونوالو د ورکشاپ په بحثونو کې په لېوالتیا سره برخه اخیستې وه او چمتو شوی محتوا د دوی د دندې له اړتیاوو سره سمه وه.
