د پوهنې وزارت مالي او اداري معین تخار ولایت ته په رسمي سفر لاړ
د پوهنې وزارت د مالي او اداري معین محترم الحاج مولوي صبغتالله «وصیل» په مشرۍ پلاوي تخار ولایت ته سفر وکړ او د یاد ولایت له پوهنې مسئولینو سره یې وکتل.
ورپسې د پوهنې وزارت مالي او اداري معین، د هغه ولایت د پوهنې رئیس محترم الحاج مولوي محمد اسماعیل ابو احمد په ملتیا، رستاق ولسوالۍ ته سفر وکړ او د یادې ولسوالۍ د تعلیمي وضعیت ارزونې په ترڅ کې یې د پوهنې له چارواکو سره هم خبرې اترې وکړې.
همدارنګه نوموړي د رستاق ولسوالۍ د تعلیمي ادارو چارواکو او زدهکوونکو ته د پوهنې وزارت د سرپرست محترم الحاج مولوي حبیب الله آغا د پیغام رسولو په ترڅ کې ټینګار وکړ چې؛ تعلیمي پروسه باید د پوهنې وزارت د پالیسیو او مقرراتو په چوکاټ کې پلې او پرمخ لاړه شي.
د غونډې په دوام، د تخار ولایت پوهنې چارواکو یاد ولایت ته د پوهنې د معین له سفر هرکلی وکړ او پلاوي ته یې د محترمې رهبرۍ د پلانونو او لارښوونو له پلي کولو ډاډ ورکړ.
