لوګر ولایت کې د ۱۵۰ تنو څخه زیاتو ښوونکو لپاره د وړتیا لوړولو سیمینار پیل شو
د لوګر ولایت پوهنې ریاست د یاد ولایت د ۴۵ بابه ښوونځیو د ۱۵۰ تنو څخه زیاتو ښوونکو لپاره د مسلکي وړتیاوو لوړولو په موخه شپږ ورځنی روزنیز سیمینار پیل کړ، چې موخه یې د مسلکي مهارتونو لوړول او د تدریسي کیفیت لاښهوالی دی.
یاد پروګرام د پوهنې وزارت له لوري د یوې همکارې ادارې په ملاتړ تنظیم شوی، ترڅو په ښوونځیو کې د تدریسي کیفیت کچه لاپسې لوړه شي.
په دې سیمینار کې به د لوګر ولایت د مرکز او ولسوالیو د ښوونځیو ښوونکي د اړوندو روزونکو څخه علمي او معیاري تدریسي مېتودونه او نوې علمي پوهه ترلاسه کړي.
د یادونې وړ ده چې د یادې روزنیزې دورې له پای ته رسېدو وروسته به د ښوونځیو ۴۰ تنو مدیرانو، سرښوونکو او د ښوونځیو شورا ۱۵۰ غړو لپاره هم ورته پروګرامونه پیل شي.
