فاریاب ولایت کې د ۲۱ مېلیونه افغانیو څخه په زیات لګښت د یو باب ښوونځي ودانۍ ورغول شوه
د یوې همکارې ادارې په ملاتړ د ۲۱.۳۴ مېلیونه افغانیو په لګښت، د فاریاب ولایت په خواجه موسی ولسوالۍ کې د المار لومړني ښوونځي نوې ودانۍ، د یو لړ مراسمو په ترڅ کې پرانیستل شوه.
د یاد ولایت پوهنې رئیس د دغې ودانۍ جوړول د پوهنبز کیفیت لاښه والي او سالم تعلیمي چاپېریال رامنځته کولو په لور یو مهم ګام وباله.
دغه ودانۍ چې په اساسي ډول په ۲ پوړونو کې جوړه شوې ده، ۱۳ درسي ټولګي، یوه اداري خونه، یو لابراتوار، د لمریزې برېښنا سیسټم، احاطوي دېوال، د پاکو اوبو یو حلقه څاه، د سپورټ لوبغالی او نور اړین ملحقات لري.
د یادونې وړ ده، همدغه ودانۍ په ۳۰۰۰ متره مربع ځمکې کې جوړه شوې، کوم چې د یادې ولسوالۍ د اوسېدونکو لخوا پوهنې ته وقف شوې وه او ۴۶۸ تنه زدهکوونکي به په یو وخت کې هلته زده کړې وکړي.
