پکتیا ولایت کې څه د پاسه ۲ مېلیونه افغانیو په لګښت د یو باب ښوونځي بیارغونې چارې پای ته ورسېدې
د پکتیا ولایت زرمت ولسوالۍ اړوند حبیب الله زرمتي لېسې بیارغونې چارې، چې د اوبو او انرژۍ وزارت د سرپرست او د سیمې خلکو په مالي مرسته د ۲ مېلیونه ۴۰۰زره افغانیو لګښت سره پیل شوې وې، اوسمهال د اوبو او انرژۍ د وزیر ملاعبدالطیف منصور، مقاماتو او مسئولینو په حضور کې ګټې اخیستنې ته وسپارل شوې.
د یادونې وړ ده، د پورته ذکر شوې لېسې ودانۍ؛ ۸ درسي خونې، احاطوي دېوال او نور اړین ملحقات لري، چې په رغېدلو سره یې ۱۸۰۰تنو زده کوونکو ته د زده کړې خوندي چاپېریال برابر شو.
د پوهنې وزارت مشرتابه، د ښوونیز نظام لاپیاوړتیا برخه کې د خلکو له مادي او معنوي ملاتړ ستاینه کوي او د تعلیمي مرکزونو له مسئولینو او زدهکوونکو غواړي، تر څو د عامه شتمنیو ساتلو او پالنې ته جدي پاملرنه وکړي.
